الأيام الجميلة

كان يا كمان !!
في قديم الزمان !!
تخرج مع العشية من المدرسة عيان !!
واقيلا يلاه درتي إمتحان !!
ترجع للدار زربان !!
عاطيها للطيران !!
علاش وكيفاش باش تتفرج لكونان !!
ولا النمر المقنع وباطمان !!
دخلتي للدار بقيتي حيران !!
لقيتيهتم دايرين تغيير تكتيكي !!
الأولى ناقلة نقاش البرلمان !!
والثانية دايرة مسلسل ميكسيكي !!
بديتي تبكي ،، بديتي تشكي !!
مك في حجرها هازَّة الدرية !!
والواليد مسكين متكِّي !!
مشات الأم وجدات اتاي العشية !!
جابت المسمن وحطات الصينية !!
ونتا طلعتي للسطح تقلب على كورة فين هي !!
قالت لك مك اجي تشرب اتاي !!
قلتي ليها هاني جاي !!
هزيتي كورة !!
وخرجتي للزنقة !!
مشيتي للدورة !!
ودرتو فرقة !!
جبتو الحجر وصاوبتو لڭوال !!
لاعبين على درهم وكورة ثمنها 60 ريال !!
بقيتو لاعبين حتى خرج الحاج من الصلا !!
وقال ليكم يا هاد الدراري سيرو لـ خلاَ !!
يا هاد الدراري الله يهديكم !!
واش ماعندكومش واليديكم !!
هز لعصى جرا عليكم !!
وشد الكورة بالموس بغا يشرڭها ليكم !!
خرجات الجارة وخرج الجار !!
ونتوما فالحارة درتو الغبار !!
صحابك صافي عياو هاد النهار !!
هوما مشاو ونتا رجعتي للدار !!
لقيتي مك ڭالسة وباك يتفرج فالأخبار !!
مك : فين كاني يا هاد العفريت !!
نتا : كنت غي مع الدراري !!
مك : سير للكوزينة راه خليت ليك الفريت !!
نتا كليتي بالزبة حيت فيك النعاس وغدا قاري !!
مشيتي تنشرتي فوق السدّاري !!
بيك بكسوة اللعب و بصندالتك !!
هزَّاتك مك وحطاتك فبلاصتك !!
مع الصباح مافقتيش بكري !!
لبستي بالزربة ومشيتي تجري !!
بغيتي تنقز الصور كيف الرتيلة !!
شافك المدير وهانتا صدقتي فموشكيلة !!
مشا جاب التيُّو لكحل باش يدير ليك التحميلة !!

إيوا هادي هي الأيام الجميلة ♥